O Festival 17º Ribeira Sacra foi novamente elixido vencedor entre os dez finalistas da categoría de Best Small Festival nos premios Iberian Festival Awards, que se celebraron en Granada o pasado venres 15 de marzo como parte do Talkfest – Music Fest Summit.

O festival, que celebra a súa oitava edición do 26 ao 28 de xullo, recibiu o mesmo galardón o ano pasado, consolidándose así, como o festival de pequeno formato de maior calidade de toda a península ibérica. O seu éxito vese acadado por ofrecer en cada edición, unha programación completa e moi coidada que se reparte entre diversos escenarios naturais da Ribeira Sacra, unha paisaxe de gran valor patrimonial e candidata a Patrimonio da Humanidade.

17o Ribeira Sacra ten moi presente o territorio onde se celebra, creando un festival cheo de experiencias vinculadas ao patrimonio, dando a coñecer unha gastronomía de quilómetro cero, sostible e de calidade a través de chefs de renome e cedendo protagonismo a algunhas das principais adegas vinícolas da Ribeira Sacra, que se converten por uns días en escenarios do festival. Todos estes ingredientes fusiónanse para dar lugar a unha experiencia única, comprometéndose co territorio e respetándoo.